عرست بي «80 جنيها» وأنا ما مع «التعددية» وشلوخي دا «علاج»
بعرف «النعام آدم» وكنت معجباً بي «سمسم القضارف»
دي قصتي مع حاج نور وفتوى رمي الجمرات من الخرطوم
اتونس معاه : شوقي مهدي - محمد شريف
ضيفنا اليوم انسان فاضل، هادئ الطبع يمتاز بطلاوة الحديث وترك التكلف، تسعد عند الاستماع الى حديثه، تحبه اذا رأيته وتشتاق الى حديثه اذا سمعته وتأنس به اذا جالسته وتستفيد من علمه وادبه وخلقه زاده الله من فضله وبارك له فيما انعم عليه، ضيفنا شيخ كرس عمره لخدمة الدعوة ، جذب اليه الناس بطريقته السهلة في توصيل المعلومة، ضيفنا شيخ محمد احمد حسن «الشايقي» عضو هيئة علماء السودان .. زرناه واتونسنا معاه لقينا انو حريص جدا بطلع الكلمة بعد تفكير طويل، وطالبنا بحذف كلام كثير خايف يزعل زول وخرجنا بهذه الحصيلة الثمينة!!
* أول شي يا شيخنا انت من وين؟
- انا من القولد الولاية الشمالية.
* انت دنقلاوي طيب اللهجة الشايقية دي شنو؟
* انا عندي «عرق» في الشوايقة وكلامي دا بجي عفويا سااي بعدين اي مجال بتلقى فيه ناس مواهبهم مختلفة الاطباء مثلا فيهم اختصاصي اطفال واختصاصي عظام ونحن في الدعوة عندنا البتكلم بالفصحى ولانو في ناس محتاجين لي نضم بالدارجية انا اتخصصت فيها والناس عجبتهم طريقتي دي.
* درست وين؟
- جزء في السودان وجزء في مصر في الاسكندرية في المعاهد الدينية وجيت الخرطوم اول مرة سنة 1966م.
* منو الاساتذة الليهم فضل عليك؟
- كتار منهم شيخ محمد ابو زهرة، محمود شلتوت، وعبد الوهاب خلاف.
* وأنت شافع صغير كنت هادئا ولا بتاع شغب؟
- كنت بالي في قرايتي ما بتاع مشاكل في المدرسة كنت نابغة عديل في كتابة الانشاء بكتب قصص خيالية زي حقت ناس نجيب محفوظ ديك الحمد لله حولت الموهبة دي لي كتابات في الدين.
* اشتغلت شنو بعد وصلت الخرطوم؟
- مع ناس الجيش اتعينت موظف في كشف الكتاب العام او ادارة الموظفين العموميين اتنقلت بين وزارة الدفاع للقيادة الشرقية القضارف مشيت حامية كسلا وشرق الاستوائية توريت متعاون فني مع اركان حرب الضابط الاداري ورجعوني كسلا وجابوني القيادة العامة الخرطوم بعداك خليتهم بعد 8 سنوات خدمة.
* مشيت وين؟
- اشتغلت في وزارة الري في المناقل 24 القرشي مدة 3 سنوات بعدها اشتغلت باشكاتب في مكتب وزير الصناعة 7 سنوات واخيرا نقلوني منتدبا في المجلس القومي للبحوث قعدت فيه 7 سنوات ونزلت المعاش الاختياري سنة 1992م بعد 25 سنة خدمة «كدي احسبوها ماياها».
* بديت الدعوة متين؟
- من «قمت» في نطاق ضيق واشتهرت سنة 1982م وظهرت اول يوم في التلفزيون قبل الاذاعة سنة 1991م ببرنامج الدين النصيحة اخترت اسمو بالتعاون مع ادارة البرامج.
* بتذكر يا شيخنا وقتك «الشلخوك»؟
- لا ، لكن سألت اهلي بعد كبرت قالوا لي دي عادة قديمة وانا عندي 4 اخوان اتنين شلخوهما واتنين لا واظن انها مرتبطة بي صحة الطفل بقولوا بتودر مرض العيون وكدي.
* شنو من العادات الضارة البتشاهدها وما عاجباك؟
- «الظار» والنياحة على الميت والحداد الزائد عن الحد تجمع النسوان في بيت البكاء اكثر من 3 يوم «ياكلن ويشربن» وكذلك تجديد الحزن على الميت يوم الخمستاشر ويوم «الاربعين» والنسوان يجن يقعدن بعد المرة تمرق من بيت العدة دا كلو مخالف للسنة.
* يا مولانا «الكشف» دا رأيك فيه شنو؟
- أي تعاون على البر والتقوى سمح واتعودنا نشوفو في بيوت الاعراس والبكيات وحالات المرض ولمساعدة الايتام والارامل والمساكين.
* البعجبك في شباب اليومين ديل شنو؟
- بعجبني فيهم الشاب المتمسك بي دينو تماااام والمعتدل.
* والما بعجبك منو؟
- الشاب الما بصلي وما شاكر لي نعم الايمان وما هماه الدار الاخرى وجاري وراء اللهو، هامل قرايتو وامو وابو راجنو هو مقضيها حوامة مع بنات الناس ووصيتي ليه يشد حيلو عشان يقود البلد دي عشان يعيش فيها معزز مكرم «هسع امريكا المتقرضمة دي» عندها شنو غير العلم.
* من مشاهداتك في الشارع العام ياتو المتمسك بي دينو الشاب واللا الشابة؟
- البنات طبعا ملتزمات اكتر من «الولاد» كمية كبيرة من النسوان يجن يحضرن المحاضرات ويصبرن لامن الدرس ينتهي ويستجيبن للوعظ وكمان يتأثرن ويقعدن بالساعات في المسجد يتعلمن علوم الدين لكن الرجال «قولة الامام السلام عليكم يشيلو جزمهم ويقوموا جاريين».
* كلمنا عن قصة زواجك؟
- زواج عادي جداً انا الاخترت «المرة» وهي «بت عمي» كان زواج بي طريقة ناس القرية سنة1968م كلفني «80 جنيه»، طبعا الزمن داك كثيرة.
* ليه ما جربت «مثنى وثلاث ورباع»؟
- بشوف انو نحن كوعاظ شغالين في مجال الدعوة قد ما نوفق بين مرتين او اربعة نسوان». والمشغول احسن ليه واحدة.
* يعني انت ما من انصار التعددية وزوجة واحدة تكفي؟- ..........
* بتشاهد شنو في التلفزيون؟
- في الوقت الحالي «ما عندي ليه زمن» ما بلقى لي «فرَقَة» حتى نشرة الاخبار ما بشاهدها.
* شايف انو الشهرة متاعب زيادة عن اللزوم؟
- مريحة من ناحية مساعدة الناس وتعبها في عدم مراعاة الناس لي وقت راحتك وما بقدروا ارهاقك يعني من صلاة الصبح التلفونات تضرب والباب «كو كو كو» يدق ادخل دا واودي دا ، الظهر ارقد اقول ليهم ما تصحوني الا صلاة العصر «ختت راسي» بس الباب «يخبت» وربنا يقدرنا نساعد كل الناس.
* بتقرأ شنو في الجريدة؟
- اذا لقيتها قدامي بقرأ الاخبار.
* اولادك طالعين ليك؟
- الحمد لله ماشين في دربي.
* الناس بسألوك انت لو غلبك شيء بتسأل منو؟
- برجع لي اخوانا الكبار المستواهم أعلى مننا وكمان برجع للمراجع.
* لعبت كورة؟
- زماان بتختلف كورتنا في القرية عن كورة المدينة ما فيها «شووت شوت» عندنا كورة اسمها «شنّق» و«شليل» و«الشد دي كنت بلعبها طوالي».
* بتشجع الهلال ولا المريخ؟
- دخلت الاستاد زمان مرتين بس ما متذكر بتين.
* سمعنا انك كنت معجبا بي اغنية سمسم القضارف؟
- الكلام دا بدري لما كنت شغال في القضارف كانت امي لما تسمع الفنانة عشة الفلاتية تغنيها تقول للجمبها (اسكتو دي البلد الفيها محمد ولدي).
* بتعرف منو من الفنانين؟
- النعام آدم.
* بتسمع اغاني منو؟
- ما بسمع الا الاناشيد الوطنية.
* بتحب الناس يعرفوا اسرارك وحاجاتك الخاصة؟
- اي زول عندو حاجات بدسها. عندي اذكار وادعية خاصة.
* رأيك شنو في الزي السوداني الجلابية والتوب؟
- الجلابية زي شرعي اسلامي والتوب ساتر.
* بتزعل لو وجهوا ليك نقدا قالوا ليك انت غلطان؟
- لا المسلم مرآة اخيه بس بفكر هل الزول دا قاصد يستفزني ولا يصححني.
* رأيك شنو في الفتاوى الظهرت حديثا في الفضائيات زي ارضاع المرأة لزميلها في المكتب وغيرها؟
- أي فتوى الزول سمعها لازم يتحرى ويسأل عن صحتها وما يصدق اي شيء.
* اغرب سؤال سألوه ليك وطالبوك بي فتوى؟
- اسئلة كتيرة ما مذكر «انتو فاجأتوني بي الحوار دا».
* اكتر الاسئلة البسألوك ليها شنو؟
- في الطلاق «ودي ما تكتبوها عشان ما يزعلوا».
* اكتر فتوى ازعجتك شنو؟
- اوراق بوزعوها مكتوب فيها فلان شاف النبي صلى الله عليه وسلم، يقول ليك وصلها لي تلاتين من اصحابك لو وزعتها ح يجيك الخير لو ما وزعتها ح يجيك مكروه الورقة دي يهودية انا عندي منها نسخ من 1968م لي هسع ما حصل لي شيء بقول للبوزعوها توبوا الى الله انتوا حسابكم عسير هسع بقوا يرسلوها في الموبايلات.
* الموبايل دا كشيء جديد رأيك فيه شنو؟
- هو نعمة ح نسأل عنها لازم نشكر الله ونقول (الحمد لله الذي سخر لنا هذا) وما نستعملها في معاصي خاصة الشباب البستعملوها في غش البنات ومعاكستهن بقول ليهم ربنا مراقبكم ح يحاسبكم بكل صغيرة وكبيرة.
* في فرقة كوميدية افرادها بقلدوا صوتك وطريقتك في الكلام عاملين برنامجك نكتة بتسمعهم؟
- ايوه ديل جوني واخدوا مني الاذن وقلت ليهم ممكن تقلدوني بس ما تفتوا لان الدين ما بقبل الهظار.
* رأيك شنو في النكتة؟
- المزاح مباح والرسول صلى الله عليه وسلم كان بمزح وما بقول الا الحق.
- المزاح مباح والرسول صلى الله عليه وسلم كان بمزح وما بقول الا الحق.
* بنسمع كل مرة اشاعة بتقول انك مشيت كدا وقالوا ليك قول كدا الاشاعات دي بتقبلها؟
- لو كانت كضب ما بقبلها لو كانت نكتة ما فيها شئ.
* من المواقف الطريفة البتتذكرها؟
- مرة مشينا بعثة الحج الله يرحمو الحاج نور قال في خطبة يجوز للحاج يرمي الجمرات قبل الزوال، قمت انا اعترضت قلت ليه يا مولانا الرمي بعد الزوال، اهااا يوم رمي الجمرات «يازول انزنقت زنقة شديدة» لما رجعت قلت ليه: «انا رجعت في كلامي فتوتك صحيحة». اها الناس سووها نكتة «يضحك».* قالوا شنو؟- قالوا حاج نور قال رمي الجمرات قبل الزوال وشيخ محمد احمد حسن اعترض وقال لا الرمي بعد الزوال قاموا الجماعة زنقو شيخ محمد احمد حسن زنقة شديدة قام نادى النعمان رئيس بعثة الحج وقال ليه: «يا النعمان السنة الجاي يجوز رمي الجمرات من الخرطوم».
No comments:
Post a Comment